U3F1ZWV6ZTU3MDY1ODc2MDUxNTVfRnJlZTM2MDAyMDg5MTQ2NDg=

إزاي تقيس الكيتونات في جسمك و أجهزة القياس بالصور

• طرق قياس الكيتونات:

▪️مبدأياً خلينا متفقين أن العملية دي مكلفة وغير إلزامية لكن لازم توضيحها للي حابب يعرف أكتر.
▪️ثانياً اللي مش ناوي يكمل علي الكيتوجينك دايت فترة طويلة، وجهة نظري الشخصية أنه بلاش يشتري حاجة غالية علي الفاضي، لكن طبعاً هو حر.

🔺 أولاً ايه هي انواع أجسام الكيتون؟

في ٣ أنواع
١- الأسيتو اسيتيت Acetoacetate أو AcAc
٢- بيتاهيدروكسي بيوتاريت Beta-hydroxybutyrate أو BHB
٣- أسيتون Acetone (وده ناتج تكسير النوعين الأولانيين)


-----------------------------------------------------------------------------------------------
🔺 قياس الكيتونات له ٣ طرق:

١- في البول: وده بيقيس الـ AcAc، وبيعتمد علي اللون كمؤشر تقريبي لوجود كيتونات في البول، وبيديك درجة لون تقارنها بالرسم اللي موجود علي العلبة علشان تعرف بالتقريب تركيز الكيتونات قليل ولا كتير.

-----------------------------------------------------------------------------------------------

٢- في الدم: وده بيقيس الـ BHB، وده بيعتمد علي جهاز شبه جهاز السكر وبيطلع لك علي الشاشة رقم وده بيكون التركيز بالتحديد وبيتقاس بوحدة mmol/L أو ميللي مولار في اللتر.
ويعتبر الواحد في حالة كيتوسيس فوق تركيز ( ٠،٥ mmol/L ) وفي ناس أكثر تشددا بيعتبروه من فوق تركيز ( ١ mmol/L ) وناس أقل تشدداً بيعتبروه من فوق ( ٠،٣ mmol/L )
وفي صورة تحت موضحة مستويات الكيتونات في الدم ودليل علي حالة الجسم حسب تركيز الكيتونات في الدم وهل الجسم في حالة
Nutritional Ketosis 
Starvation Ketosis 
Diabetic Keto Acidosis (DKA)

والميزة التانية في الاجهزة دي انها بتساعدك علي قياس السكر في الدم، واللي بيكون مؤشر مهم يقول لك أنك في أمان وأن السكر في مستوياته الطبيعية وأنك مش في حالة DKA
اعرف اكتر عنها من خلال المقاله فى الرابط التالى 

الفرق بين حاله الكيتوسيس حالة الـ DKA المرضية
-----------------------------------------------------------------------------------------------

٣- في النفس: وده بيقيس الأسيتون (وده للأسف اجهزته لسة منزلتش تجارياً بصور متوفرة لكن المفروض أنها هتنزل قريب، فهنتكلم عنه انهاردة بشكل مختصر لغاية ما يتم توفرهم تجارياً)
لكنه يعتبر تاني أدق حاجة بعد قياس الكيتونات في الدم، وفي كذا دراسة وضحوا تقارب القرايات بنسبة كبيرة بين القياس في النفس والدم.


-----------------------------------------------------------------------------------------------
⬅️ بالنسبة لقياس الـ AcAc في البول

- يعتبر أرخص الطرق الثلاثة وبدون أي ألم مش زي القياس في الدم.
- في شرايط بتتباع في الصيدلية اسمها ketostix أو ketone sticks
- بتكون دقيقة في الأول بس وبعد كدة لا يعتمد عليها وده لأنها بتقيس الـ AcAc وبتفشل في الكشف عن الـ BHB واللي يعتبر أهم نوع من أجسام الكيتون وأنه هو المصدر الأساسي لطاقتك في حالة الـ Fat Adaptation فبالتالي ممكن جداً ميكنش عندك AcAc في البول لكن كمية الـ BHB في دمك ممتازة وأنت في أحسن حالات الـ Adaptation وفي الآخر الشرايط تديك نتيجة سالبة.
غير أنك بتكون في حالة إعتماد أساسي على أجسام الكيتون كمصدر للطاقة فبالتالي بيقل الفائض اللي بيطلع في البول، فممكن جداً يطلع لك نتيجة بالسالب وأنت في أحسن حالات الـ Fat Adaptation
- ممكن علشان توفرها لإستخدام أكتر تقص الشريط بالطول نصين قبل استخدامه وبكدة تبقي ضاعفت كمية الشرايط.
-----------------------------------------------------------------------------------------------


⬅️ بالنسبة للقياس في الدم
- رغم أنها أدق طريقة فيهم إلا أنها أغلاهم وأكترهم تعب في أنك تلاقي منتجاتها وشرايطها وإلي حد ما مؤلمة علشان بتضطر تشك صباعك علشان تطلع نقطة دم تقيس بيها السكر والكيتونات.
- يقال أن أفضل وقت للقياس بيكون الصبح أول ما تصحي لكذا سبب والحقيقة أن في أسباب منهم عكس بعض لكن لو قرأتهم كلهم هتوصل لنفس النتيجة، أن أفضل وقت هو القياس الصبح..
• الأسباب هي:
١- نسبة الكيتونات في الدم بتكون في أقل حالاتها الصبح لكون هرمون الانسولين في أعلى حالاته الصبح. وبالتالي القراية هتديك تركيز الكيتونات الطبيعي بدون تأثير أي أكل أو شرب يديك تركيز وهمي أو عالي بالغلط.
٢- نسبة الكيتونات في الدم الصبح بتكون في أفضل حالاتها (الطبيعية) لأنها بتكون بعد صيام مدة طويلة (مدة النوم) وقبل تناول أي أطعمة تؤثر علي التركيز بالسلب أو الإيجاب.
٣- تكوين الكيتونات وإفرازها بيكون وقت النوم فبالتالي وأنت لسة صاحي بيكون أكبر تركيز طبيعي للكيتونات في دمك والقياس في وقتها بيكون دقيق وأقرب حاجة لكونه صحيح.
- في جهازين والاتنين للأسف مش متوفرين في مصر، واحد فيهم متوفر علي موقع امازون وواحد فيهم متوفر علي موقع الشركة المنتجة وعندهم موزع معتمد بيوصل لمصر.
•• الجهاز الأول المتوفر على موقع أمازون :
اسمه التجاري Precision Xtra في أمريكا وأسمه التجاري FreeStyle Optium في أوروبا وأستراليا.
أقدم جهاز في السوق وكل الناس جربته ومفيش منه شكوي
الجهاز نفسه رخيص نوعاً لكم مشكلته في الشرايط فهي تعتبر غالية نسبياً (حوالي ٢،٢٥ دولار للشريط).

•• الجهاز التاني واللي موزعه المعتمد بيبعت لمصر:
اسمه Keto Mojo 
لسة نازل السوق من شهرين تلاتة
لغاية دلوقتي مفيش شكوى منه الا انه يعتبر جديد نوعاً.
الجهاز اغلي شوية من النوع الأولاني لكن الشرايط أرخص بكتير (الشريط بدولار)
وحالياً علشان لسة جديد فمعمول عليه عروض وخصومات كويسة جداً.
وده الموقع بتاعهم :


-----------------------------------------------------------------------------------------------
•• ومن باب العلم بالشيء في جهاز تالت أسمه Nova Max Plus بس مش منتشر قوي، ومشكلته الأساسية أنه تحت تركيز معين من الكيتونات بيديك قراية LO حتي لو كنت في حالة كيتوسيس، لأنه بالأصل معمول لمرضى السكر للكشف عن الحالة المرضية DKA واللي بيكون تركيز الكيتونات فيها عالي جداً.

-----------------------------------------------------------------------------------------------

⬅️ بالنسبة للقياس في النفس:

يعتبر الجهاز الوحيد المتوفر حالياً هو جهاز اسمه Ketonix واللي اخترعه مهندس سويدي اسمه Michael Lundel 
وهو جهاز بيتشحن زي الموبايل بشاحن USB وممكن تستخدمه الاف المرات.
مايكل اخترع الجهاز ده بعد ما تم تحديد إصابته بالصرع ومحاولة علاجه ومضاعفة جرعات الدواء بتاعته حوالي ١٠ مرات في سنة واحدة بدون نتايج مرضية، لغاية ما اكتشف الكيتوجينك دايت واللي ساعده جداً علي تقليل نوبات الصرع بشكل كبير.
والجهاز بيعتمد علي الألوان في تحديد تركيز الكيتونات فيعتبر أقل دقة من القياس في الدم، لكن المؤشرين (الدم والنفس) بيكونوا تقريباً في نفس التركيز. إلا أن واحد بيديك نتيجة دقيقة والتاني بيديك نتيجة تقريبية.

يقال أن في شركة يابانية في طريقها لطرح جهاز للقياس بالنفس وبيتوصل بالتليفون علشان يسجل القرايات ويحتفظ بيها.
وشركة تانية سويدية في طريقها لتصميم جهاز تاني.
لكن الكلام ده بقاله فترة ولسة لغاية دلوقتي مش متوفر بصورة تجارية أعرفها.

-----------------------------------------------------------------------------------------------
بس كدة .. يارب يكون الموضوع وضح الطرق بدون تعقيدات .. وأي اسئلة سيبوها في التعليقات و إن شاء الله هجاوب عليها في أقرب فرصة.
ليست هناك تعليقات
إرسال تعليق

إرسال تعليق

الاسمبريد إلكترونيرسالة