القائمة الرئيسية

الصفحات

ماهى حاله الكيتوسيس والفرق مع حالة الـ DKA المرضية







أنا خايف ابدأ كيتوجينك دايت علشان الناس كلها بتقول لي هيحصل لك
Keto acidosis

هل الكلام ده صح؟

- مبدأياً الكيتو اسيدوزس بتحصل لحالتين:

١- مرضي السكر من النوع الأول

٢- مرضي السكر النوع التاني في الحالات المتقدمة من مقاومة الأنسولين.


- في النوع الأول بيكون مستوى الأنسولين منخفض جداً أو معدوم لأن البنكرياس مش بيفرز انسولين أو بيفرز كمية قليلة جداً جداً.
- في النوع التاني مستوى الأنسولين بيكون عالي جداً لكن الخلايا مش قادرة تستخدمه لأنه في نوع من مقاومة الخلايا للأنسولين.
- طيب ايه بقي حالة الكيتواسيدوزس دي؟

هي حالة بتحصل لما الجسم بيحس أن مفيش سكر خالص، رغم أن فيه سكر كتير جداً،
فبيبدأ يفرز كيتونات بغزارة علشان يعوض الجسم عن نقص السكر، بيفضل السكر يعلي لأنه موجود في الدم ومفيش انسولين يدخله الخلايا (النوع الأول) أو الأنسولين موجود بس الخلايا بتقاومه (النوع التاني) فيرتفع مستوي السكر لفوق ٢٥٠ مجم/ديسي لتر (وحدة قياس السكر في الدم) ويرتفع مستوي الكيتونات لبين ٨-١٢ ميللي مول/ لتر.


- طيب ليه مبيحصلش الكيتواسيدوزيس لمتبعي الكيتوجينك دايت؟

لأن الإنسان الطبيعي اللي جسمه مفيهوش مشاكل في البنكرياس بيحصل له الآتي:
في نوع من التوازن بيحصل بين الكيتونات والأنسولين بحيث أن كل ما الكيتونات بترتفع بيفرز الجسم انسولين (سواء كل مرة تاكل فيها اي وجبة، أو حتي بدون وجبات بس بكميات أقل طبعاً) بحيث يعادل كمية الكيتونات في الدم.

وده السبب أن علي طول متبعين دايت الكيتو بيكون سكرهم في الدم تحت الـ ٩٠ أو ٨٠ مجم/ديسي لتر وأقل كمان حتى بعد الأكل مباشرةً، ومستوي الكيتونات في الدم مابين ٠،٥ لـ ٥ مللي مول/لتر وفي الغالب بيعدي الـ ٢ مللي مول/لتر بالعافية

- طيب ايه اللي بيحصل لو الواحد صام لمدة كذا يوم؟

الأنسولين هيتفرز بمستوى أقل طبعاً لأن مفيش وجبات بتتاكل تعلي الأنسولين في الدم، فبالتالي معادلة الكيتونات بتكون بنسبة أقل بيرتفع مستوي الكيتونات في الدم لما بين ٤ لـ ٦ أو ٧ مللي مول/لتر وبرضة مبيرتفعش عن الـ ٨ مللي مول/لتر ومستوى السكر برضة بيكون منخفض فبالتالي الجسم برضة ميوصلش لمرحلة الكيتواسيدوزيس..
أتمنى تكون وضحت بسهولة وميكونش الكلام معقد.

تعليقات

التنقل السريع