القائمة الرئيسية

الصفحات

الدهون اثناء الحرق والتخزين والتخسيس مصادر التخزين

الدهون المخزنة اسمها دهون ثلاثية (triglycerides) ودي عبارة عن 3 أحماض دهنية متوصلين مع بعض بسلك اسمه جليسرول (glycerol)



هي الدهون بعد ما ناكلها بتروح فين؟

الإجابة علي حسب انت أكلت معاها إيه؟


يعني لوأكلت معاها كربوهيدرات يبقي جزء بسيط بيمتص علشان جزء بيدخل في تكوين جدران الخلايا،
adipose tissues  جزء بسيط حيتم استخدامه كمصدر للطاقة. و السواد الأعظم حيتم تخزينه في صورة دهون ثلاثية داخل الخلايا الدهنية .

انما لو حضرتك مأكلتش  كربوهيدرات مع الدهون -و عارف ان الكارب أساس كل كرب – يبقي جسمك محتاج ساعتها مصدر لطاقة بديلة غير الجلوكوز

 ساعتها حيبدأ يطلع من  الخلايا الدهنية الطاقة المتخزنة في صورة دهون ثلاثية   .


اللي بيحصل فيهم بقي.
السلك ده بيروح الكبد يتحول لجلوكوز في عملية مهمة اسمها (Gluconeogenesis)،
اهميتها بترجع انها بتحافظ علي مستوي الجلوكوز في الدم
علشان كدة حضرتك في الصيام و في الكيتو دايت بيفضل سكرك في الرينج الطبيعي
طالما معندكش أي أمراض تسبب عكس ذلك.

بالنسبة للأحماض الدهنية بتدخل دورة كربس علشان تنتج طاقة،
طبعاً الطاقة المنتجة بتبقي أكبر لإن جزيء الدهون فيه ذرات أكبر من الجلوكوز،
لما بيحصل تراكم في منتجات دورة كربس، بتروح الأحماض الدهنية إلي الكبد و يتحولوا لكيتونات (ketone bodies)
بيدخلوا جوا دورة كربس (kerbs cycle) علشان يولدوا طاقة، اللي الجسم بيستفاد بها في عملياته الحيوية.

آه في جزء ممكن ينزل في البول، فيه جزء بيطلع في النفس،
انما السواد الأعظم بيستغله الجسم كمصدر طاقة قوي عن الجلوكوز في انتاج الطاقة.

مثلاً 100 بيتاهيدروكسي بيوترات ( BHB) بينتج 10500 جرام ATP، بينما 100 جرام جلوكوز بينتج حوالي 8700 جرام ATP ( اللي هو ببساطة
وحدة الطاقة اللي من بواسطتها بتقوم الخلية بعملها)



طيب برضه الكيتونات دي بتروح فين؟


لانها مواد عضوية فبتستغل الأكسجين لإنتاج الطاقة (ATP) عن طريق التفاعل مع الأوكسجين فبينتج مياه و ثاني اكسيد الكربون.
زي ما بيحصل مع الجلوكوز بالظبط،
الفرق ان جزيئ الجلوكوز بياخد 6 جزيئات اكسجين و بيطلع 6 ثاني اكسيد الكربون و 6 مياه،
بينما جزيء الدهون بياخد 9 اكسجين علشان يطلع 6 ثاني اكسيد الكربون .

ايه فايدة الكلام ده؟


العلماء أخدوا المعلومة دي و عملوا منها حاجة اسمها respiratory quotient
دي ترجمتها في جوجل ( الحاصل التنفسي) بيقدروا من خلالها يعرفوا ايه مصدر الطاقة اللي بيعتمد عليه الكائن الحي في غذائه يا تري بيحرق جلوكوز ولا دهون ولا بروتين ولا ميكس.

حسبتها ببساطة كمية ثاني اكسيد الكربون اللي طالع في الزفير / كمية الاكسجين اللي داخل.
RQ= volume of CO2 produced / volume of O2 consumed per unit of time

بالنسبة للكربوهيدرات بتبقي 1 و بالنسبة للدهون بتبقي 0.7 و ده احنا شرحناه حنقسم 6/6 في حرق الجلوكوز، و حنقسم 6/9 بالنسبة للدهون.

النسبة دي اهميتها بحثية اكتر ما منها اكلينيكية،
بمعني اننا بنستخدمها في الدرسات اكتر ما هي تطبيقية في المجال الطبي كالتشخيص و خلافه،
الا بعض الاستثناءات مش متاح دلوقتي شرحها.

القصد الدهون لو بتاكلها مع الكربوهيدرات الجسم حيخزنها لوقت عوزة
و طول ما انت بتاكل الكربوهيدرات الجسم حيفضل محوشها.
( زي دولة قاعدة بتشتري في سلاح و هي مش ناوية تحارب أبداً ) ،
انما لو بتاكلها مع نسبة كربوهيدرات صغيرة زي ما بننصح في ( الكيتوجينك دايت)،
الجسم حيحرقها و يحولها لميه و ثاني اكسيد الكربون.
يعني تاكل دهون تحرق دهون،
تاكل كربوهيدرات حتخزن دهون. 

ياتري بعد الكلام ده حضرتك عايز ايه؟

تحولها لميه و ثاني اكسيد الكربون ؟

ولا حتخزنها زي صفقات السلاح لدولة عاملة سلام دائم شامل مع الكربوهيدرات؟

تعليقات

التنقل السريع