مكرونه كيتو - بديل المكرونه لرجيم الكيتو دايت بالجبنه

بديل المكرونة... القرنبيط!

هتقولولي ايه الكلام ده؟ ايه اللي جاب القلعة جنب البحر؟ هقولوكوا جربوا بنفسكم ومش هتصدقوا! انا ماكنتش مقتنعة لحد ما جربت!

وصفة النهاردة هي الماك أند تشير كيتو (او لو عايزينها تقلب مكرونة بشاميل باللحمة المفرومة ممكن برضو)

الماك أند تشيز (وممكن تقلبوها مكرونة بشاميل عادي):

مكونات ومقادير مكرونه الكيتو دايت

٥٠٠ جرام قرنبيط، حوالي ٤٠٠ جرام جبنة شيرد (انا بحب الجبنة تكون كتير) فالوصفة دي أنا استعملت نص شيدر احمر ونص شيدر عادية، نص علبة جبنة كريمي حوالي كوباية الا ربع (جبنة كيري بديل حلو للجبنة الكريمي)، زبدة او سمنة او زيت زيتون او زيت جوز هند، ملح وفلفل حسب الذوق، رشة جوزة الطيب ورشة جنزبيل بودر (اختياري أو اي بهارات بتحبوها)، دقيق لوز او دقيق جوز هند او سيليوم (اختياري. أنا استعملت شوية من دقيق اللوز علشان الخليط يمسك نفسه شوية)، بيضة أو بيضتين حسب حجم البيض، ربع كوب كريمة طهي.

طريقه عمل مكرونه كيتو دايت

أول حاجة لازم نعرفها ان القرنبيط طعمه مش هيكون زي المكرونة، لكن الطعم قريب من المكرونة وجميل.

نبدأ بالقرنبيط. هنقطع الزهرات لقطع صغيرة تكون اكبر من المكرونة المرمرية واصغر من المكرونة القلم بشوية ونحاول قدر الامكان نخلي كل الزهرات متقاربة فالحجم علشان الطهي يكون متساوي.

بعد ما قطعنا القرنبيط نغسله كويس. انا نقعته في ماية بخل لفترة بعد كدة صفيته وغسلته بماية جارية.

طهي القرنبيط: ممكن تسلقوه مع شوية كمون أو ممكن تعملوه زي ما عملته. أنا جبت طاسة مابتلزقش وحطيت شوية زيت جوز هند (زبدة او سمنة او زيت زيتون) وشوحته عالنار لحد ما اخد لون ذهبي، بعد كدة سقيته شوية ماية مش كتير بحيث يتشربها كلها وحطيت الملح والبهارات وسبته يستوي. وهو بيستوني أنا بشرت الجبنة وجهزتها للصوص.

بعد ما القرنبيط شرب الماية نزلت عليه بالجبنة الكريمي وقلبت كويس لحد ما ساحت بعد كدة نزلت بالجبنة الشيدر وقلبت كويس لحد ما ساحت. (لو هتعملوا مكرونة بشامل بدل ماك أند تشيز يبقى هتحطوا كريمة طهي بكمية معقولة وكتيرة كدة علشان هي اللي هتكون البشامل وتقلبوا كويس. وتقسموا الكمية نصين نص في قلب الصينية وبعد كدة اللحمة المعصجة وفوق اللحمة تحطوا النص التاني وترشوا جبنة وتضبروا بيضة أو اتنين مع ربع الكوب كريمة وتحطوه على وش الصينية)

طيب دلوقتي القرنبيط والجبنة حلوين مع بعض بس عايزين الصوص يمسك نفسه شوية. نحط معلقة كبيرة سيليوم او دقيق لوز او دقيق جوز هند والخطوة دي اختياري. انا هنا حطيت حوالي نص كوب دقيق لوز علشان الصوص كان سايب مني خالص وعايزاه يمسك نفسه شوية.

بعد كدة نجيب الصينية اللي هنسوي فيها ونحط الخليط فيها ونرش جبنة لو حابيين. بعد كدة نكسر البيض في بولة ونحط رشة الفلفل واي بهارات تحبوها ونحط ربع كوب الكريمة ونضرب كل ده كويس وننزل بيه على وش الصينية. بعد كدة ندخلها الفرن تاخد لون بني ذهبي وبكدة تكون استوت ونطلعها ونسيبها تهدى شوية وبعد كدة نقطعها وبألف هنا.

ملحوظه !

بالنسبة للطعم، هل هو مكرونة؟ لا

هل هو مقبول؟ جداً!

هل طعم القرنبيط قوي؟ لو استوى كويس مش هيكون قوي، والتشويحة اللي اديتهاله خلت طعمه حلو



الكيتو دايت: دليل المبتدئين للتنحيف والتخسيس
القرنبيط منقوع في ماية وخل ابيض علشان اغسله




بعد ما شطفته كويس حطيته في طاسة فيها زيت جوز هند وشوحته



زودت ماية تغطي القرنبيط علشان يشربها كلها وحطيت ملح وجوزة الطيب ورشة جنزبيل بودر




 القرنبيط شرب نص الماية



تضيفى بالجبنة الكريمي. الجبنة الكيري بديل كويس جداً للجبنة الكريمي




ده النوع اللي بشتريه هنا استعملت نص العلبة دي




قلبت الجبنة الكريمي كويس وساحت نزلت بالجبنة الشيدر العادية والحمرا



هنا كله على بعضه الجبن والقرنبيط



بعد ما حطيت الخليط في صينية بايريكس صغيرة



بعد ما رشيت جبنة شيدر. ممكن تحطوا موتزريلا او بارميزان او فلامنك او جودا




هنا انا استعملت بيضة واحدة لأن الكمية اللي جهزتها صغيرة، فبيضة واحدة كانت كفاية، وعليها ربع كوب كريمة ورشة فلفل ورشة زعتر بالغلط لأني افتكرت العلبة علبة البقدونس المجفف فقلت يلا مش مهم



بعد ما ضربت البيضة



هنا بعد ما نزلت بخليط البيضة مع الكريمة




 طلعت من الفرن مباشرة ولسة سخنه




هنا بدأت تهدى وجاهزه للتقطيع



يمكنك اضافه الكيمتشى الصينى للمكرونه الكيتو لاضافه طعم رائع

مكونات الكيمتشى الكيتو

• ‏-1 رأس ملفوف صيني
• ‏-12 كوب ماء بارد
• ‏-½ كوب ملح
• ‏-¼ كوب صلصة سمك
• ‏-¼ كوب زنجبيل مبشور
• ‏-1/3 كوب فلفل أحمر حار كوري
• ‏-6 فص ثوم مهروس
• ‏-4 بصل اخضر متوسط
• ‏-½ 1 معلقة صغيرة سكر
• ‏-2 دايكون (فجل صيني أبيض) مقطع أصابع رفيعة

طريقه عمل كيمتشى صينى للكيتو 

1. افرمي الخس فرماً خشناً وضعيه في وعاء ثم ضيفي فوقه الملح.
2. اخلطي الخس بيديك حتى تتغمس كل الشرائح بالملح ثم اسكبي الماء.
3. صفي الخس من الماء وضعيه في وعاء جانباً.
4. في وعاء كبير اخلطي الدايكون مع البصل الأخضر والفلفل الأحمر الحار والزنجبيل والثوم وصلصة السمك والسكر.
5. ضيفي الخس فوق الصلصة وقلبي بيديك حتى تتغطى الشرائح بالصلصة.
6. ضعي الكيمتشي في برطمان مغلق باحكام لمدة 24 ساعة في مكان مظلم.

هنا بعد ما قطعت قطعة منها وطلت مش سايلة مني كويس قوي ده كرنب متخمر (مخلل) اسمه كيمتشي وده حاجة كدة في المطبخ الكوري مفيد للهضم وفيه بكتيريا مفيدة للمعدة





 فى انتظار تعليقاتكم على الوصفه وتقيمها

يمكنك مشاهده جميع وصفات كيتو من خلال الرابط التالى

وصفات كيتو